Translate

Tuesday 20 May 2014

Bekira Gawai Nyau Semak-sesemak

20.5.14 ~ Cherita Gawai Nyau Semak-sesemak
Hari Gawai kitai Iban nyau majak semak sesemak deka datai. Tentu kitai bepikir lalu ngerunding nama utai ti deka dikereja, merambu lalu ngira tiap bengkah pengawa ti deka dikereja. Tentu kitai kala ngasaika peneleba ba diri empu, mayuh bendar utai tauka pengawa ti diperundingka. Kadang-kadang kitai tebelenga ngapa, tusut runding, pedis pala laban kelalu mayuh bekira. Bekira tu sebengkah ari utai ke enda tau enda diaduka kitai lebuh deka ngereja pengawa, kelebih agi ngintu pengerami baka Gawai Dayak tu. Mayuh bendar utai deka dikira baka anak belanja (duit), hari, jam, perengka, penekul, enggau ti bukai. Baka ngintu pengawa ke besai-besai baka Gawai Antu, Melah Pinang enggau gawai besai ke bukai tentu mayuh bendar utai sereta perkara ti deka dikira kitai. Bekira tu mayuh tikas enggau lebas. Keterubah, bekira ke pemesai rampa pengawa ti deka dikereja; kedua, nentuka program iya; ketiga, berundingka kus tau anggar belanja; keempat, empas pengawa ti deka dikereja udah tu ila. Lebuh kitai ngenang pasal pengawa bekira ke pemesai rampa pengawa dia dih kitai mesti deka nemu tuju, bungkur, pengelama enggau baka ni chara kitar deka mutarka iya. Hal tu beguna amat ba penemu aku laban iya tau bendar ngasuh pengawa kitai mujur dikereja enti kitai nemu tunga uing iya. Tambah mega kitai ulih belemati sereta pengih ngereja pengawa tungkah ari pengawa ke merambu datai ke tembu pengawa. Ba senentang pengawa nentuka program iya kitai enda tau enda bekira pasal atur, tusun enggau ripih pengawa. Pekara ke beguna bendar ba senentang tu, kitai Iban mesti nemu milih lalu nentuka bagi sapa orang ke megai, ngatur sereta ngemujurka pengawa. Tentu mih kitai milih orang ke bisi penemu, penau enggau pengelandik ba pengawa nya. Tambah mega orang ke bisi penemu enggau peneleba tau bendar nyadika bulubalang sereta sanding penemu ti beguna bendar. Nangkan ke tu mega, pasal kus. Kus tauka ungkus lebuh ngereja sesebengkah pengawa sigi enda ulih diseliahka, baik iya besai tauka mit. Tiap-tiap pengawa sigi begunaka anak belanja magang. Senutuk enggau tu, kitai Iban patut nemu merambu, ngaga kira-kira sereta bejimat lebuh ngatur belanja dikena gawai. Laban ari ke nemu ngatur angar belanja iya tau bendar nagang bala sida 'antu rua, antu rangka' datai nguang pengawa kitai di rumah panjai. Ari nya, kita patut bisi ngembuan bajit tauka angar belanja ti patut sereta engkeman enggau pengawa diri. Kepenudi iya, pasal empas pengawa kitai. Ba orang ke landik pasal penemu 'sosiologi' tiap bengkah pengawa endang enda ulih diseliah enggau kaul, randau, uti, sereta bungah lebuh ke betundi sereta richah ngintu pengerami. Selalu nya empas ti deka dikenang aku iya nya empas negatif tauka iya ke enda manah baka belaya, sarak, ninding, enchuri, ngerusak utai, niat ati ke manah enggau orang sereta mayuh ke bukai. Nyadi, ba senentang empas ba pengerami baka gawai tu kitai anang neju kediri tepalit, yiar kediri empu, anang malit sereta anang jaku rangkai enggau pangan diri. Ari nya, semua pengawa enggau pengerami kitai tau bendar mujur sereta nyampai juluk ati enggau niat ba diri empu lalu ba diri sebilik mega. Bekira mih, anang enda bekira laban gawai nyau semak-sesemak.

Keranjai jari,
Apai Endun